(Photo by Bisaya Ko Vines)

Isumat.com/Hulyo 21,2021

Iginmando na han pamunuan han LGU-Matalom, Leyte an paghatag han kaangayan nga ayuda sugad man an mahugot nga imbestigasyon dida han natabo nga aksidente kakulop, Hulyo 20, kun diin usa nga empleyado han munsipyo an naawat an kinabuhi.

Hi Matalom Mayor Eric Pajulio in personal nga nakikigsumpayan ngadto han mga biktima ug han ira tagsatagsa nga pamilya basi hul-os nga mahipadangat an kaangayan nga hinabang.

Dida han inisyal nga imbestigasyon, pira nga mga empleyado han LGU in sakay hin usa nga jeep ug hira in nagbibiyahe tikang ha Matalom tikadto ha Malitbog, Southern Leyte. Pasado alas 4 han kulop, samtang nasaka ha bukiron nga parte han kalsada an jeep, tigda la nga waray na umandar an makina han sarakyan.

Nagtipa-atras an sarakyan ngan tungod nga nawarayan na kontrol ha manibela an drayber, nahulog an sarakyan ngadto hin bakilid.

Ginkilala an namatay nga hi Alberto Payac, residente han Brgy Hitoog, Matalom. Hiya an drayber han sarakyan. Gindeklarar hiya nga Dead on arrival ha hospital.

An mga nag-antos hin karamtan ha lawas ngan gindara ha Living Hope Hospital ha Maasin City amo hira Bea Pagay, Antoniette Ocba, ngan Aireen Godez.

An iba pa nga ira kaupdanan in gindara naman ngadto ha Sogod District Hospital ha Sogod, Southern Leyte.

Tobtob han ginsusurat ini nga notisya, waray pa impormasyon kun ano an tuyo han mga empleyado han LGU-Matalon didto han ira ginkakadtuan nga amo an Malitbog, Southern Leyte. An Matalom amo an katapusan nga bungto han Leyte kun tikadto ha Southern Leyte. # (With report from Bisaya ko Vines)