Isumat.com/9:03AM, Pebrero 12, 2021

Kun ikaw usa nga mayor ug an imo bungto in may problema labi na ha infrasructure nga makakapugong hin pagbabaha, makikigsumpayan kaba han kongresista nga nakakasakop han distrito basi umaro hin ayuda?

Ini an iginlabyog nga paki-ana ni iFM-RMN Tacloban Anchorman Eduard Sanagan kan Palo, Leyte Mayor Ann Petilla dida han programa nga “Straight to the Point” yana nga aga (Pebrero 12, 2021).

Kun aton manunumduman, dida han nag-agi nga Mierkules, pira nga bungto ha Leyte an duro an baha tungod han waray hunong ngan makusog nga uuran. An Palo in usa han grabe nga apeketado kun diin porlomenos 20 nga barangay ngan 3 Mil katawo an gin-evacuate tungod han babaha. Ini in labot la han usa ka tawo nga nalumos ha Brgy Caloogan.

Hi Mayor Petilla in sugad-sugad waray derekta nga kabatunan han paki-ana ha iya. Iya la ginsering nga ” I hope nga makabulig hiya ha amon ha bungto han Palo, kay munsipyo man la kami.”

Iginbuyagyag gihapon han alkalde nga waray pa hira magkita ngan maghimangraw hin personal ni Leyte 1st District Cong. Martin Romualdez tikang lumingkod hiya ka-Mayor. An 1st District in nakakasakop han Tacloban City, Palo, Babatngon, Alangalang, Sta Fe, San Miguel, Tolosa ngan Tanauan.

Iginpatapod ni Petilla nga bisan kun 3rd Class Municipality la an Palo, tim-os an iya paningkamot nga matagamtaman han mga residente kun ano man an mga proyekto nga akos han ira pondo.

Hi Roumaldez amo gihapon an Majority Floor Leader nga dako an poder ug impluwensya ha kongreso labi na ha pag-alutaga hin pondo.

Han nag-agi nga pira ka dekada, an pamilya Romualdez ug an lahi han Petilla in alagid-agid hin mga higante ha pulitika nga pirmi nagapil ha magkaluyo nga pwersa. #