(Image by dreamshine.com)

Isumat.com/3:44AM, May 26, 2020

Igindig-on ni Mayor Thelma Nicart han San Policarpo, Eastern Samar nga waray niya nahimo nga kasaypanan kasumpay han alegasyon nga nanginlabot hiya han pagdistribuer han Social Amelioration Program (SAP) cash assistance para han mga residente han iya bungto.

Ini an nagin pagklaro han alkalde kasumpay han nahireport nga pagsampa hin kaso kontra ha iya han Criminal Investigation and Detection Group (CIDG) kakulop nga adlaw. An kaso in dara han reklamo ni Tanauan Barangay Captain Rudy Picardal nga nag-alegar nga waray makatagamtam an iya barangay han SAP tungod kay nagmalahimo hin paagi an alkalde nga mahingadto ha iba nga lugar an ayuda pinansyal nga para unta ha Brgy Tanauan. Ini in tungod daw nga waray sumuporta an kapitan kan Nicart dida han pinili-ay.

Dida han iya facebook post kagab-i, nagsering hi Nicart nga inosente hiya ngan waray ginpapatamakan an akusasyon kontra ha iya. Iya gihapon iginpahayag nga tobtob kagab-i, waray pa makakarawat an iya kampo han pormal nga dokumento tikang ha korte mahitungod hini nga kaso ngan ha social media la niya nasabtan an alegasyon.

Kasumpay hini, nagsumat hi Nicart nga andam hiya ug an iya mga abogado pagbaton han mao nga alegasyon ngan dako an iya pagtoo nga pamulitika an nagpapaluyo hini nga panhitabo.

Nagpatapod gihapon an opisyal nga magpapadayon an iya panlimbasog nga pangunahan an pagtukdaw han bungto tikang han makarimadima nga epekto ni bagyo Ambo. Sumala pa ha iya, ini nga akusasyon in deri makaka-ulang han iya paghatag hin tim-os nga serbisyo ha iya mga nasasakupan.

Ginpasalamatan gihapon ni Nicart an mga mulopyo nga padayon an pagtapod ha iya labi na yana nga nagkakadurungan an gin-aantos nga krisis.

An San Policarpo amo an lugar kun diin syahan nga nag-landfall hi Ambo ug haros 70 porsyento han kabablayan didto an nagkaruruba labot la han duha ka tawo nga namatay. # (KEVIN SIOSANA)