Isumat.com/12:54PM, September 14, 2020
Naka-recover na tikang han epekto han Covid-19 hira Catbalogan City Mayor Dexter Uy ug an iya bugto nga hi Councilor Stephanie Uy-Tan.
Malipayon nga iginpasamwak ni City Inter-Agency Task Force Spokesperson Reign Munoz nga an magbugto in natapos na han katorse ka adlaw nga Isolation. Pero ginklaro ni Munoz nga hira Mayor Uy ug an konsehala in magkaka-ada pa hin pito ka adlaw nga Home Quarantine komo pagsunod han patakaran didto han ira syudad.
Kun aton manunumduman, an magbugto nga mga opisyal in magkasunod nga nag-anunsyo nga natapnan hira han virus sobra na duha ka semana an nag-agi.
Nagpahayag pa hi Munoz nga bisan kun natapnan an alkalde, nagpadayon hiya pagtrabaho han iya mga obligasyon komo amay han syudad.
Kadungan hini, nagpasabot gihapon hi Munoz nga ginbukalas na an Enhanced Community Quarantine ha bug-os nga Catbalogan. An iba nga mga parte han syudad in aada na ha General Community Quarantine ngan pipira-pira nala nga lugar an aada ha ECQ.
Umabot na ha 512 an mga Catbaloganon nga nagpositibo han kagaw. Dida hini, 354 na an naka-recover ngan tulo an namatay. An Active Cases hapagkayana in aada ha 156. #
