Isumat.com/Hunyo 19, 2021
Nadugangan na liwat an mga alkalde ha Rehiyon Otso nga natapnan han Covid 19 han magpositibo han kagaw hi Arteche, E. Samar Mayor Roland Evardone.
Ha iya facebook account, iginsumat ni Evardone nga umabat anay hiya hin mga sintomas nga kanan trangkaso pero nawara ini katapos hin duha ka adlaw. Kasering niya nga waray hiya katapni han Covid, pero duha han iya kaupod ha balay in nagpakita liwat hin sintomas, sanglit nagpailarum hiya hin RT_PCR Test ngan gumawas nga na-igo hiya han virus.
Hapagkayana, waray na niya gin-aabat nga sintomas pero magpapadayon hiya han iya isolation. Negatibo naman han virus an iya kapikas ha kinabuhi.
Pira pa la ka adlaw an nakalabay, hi Mayor Lovely Yu han Alangalang, Leyte in nagpositibo gihapon han nasabi nga sakit ngan yana gintatambal ha usa nga hospital ha Tacloban City.
An Eastern Visayas in nakaka-eksperiensya yana hin paglobo han mga kaso han Covid ngan kadam-an na nga mga hospital in aada na ha full-capacity an mga Covid Wards. Nagdugang na ngani hin mga medical personnel tikang ha PNP, BFP ngan AFP basi ig-deploy ngadto han mga hospital ha Tacloban nga nagkukulang na hin mga nurses ngan doktor tungod han nagtitikadamo nga pasyente. #
