Isumat.com/5:53AM, August 21, 2020
Hi Mayor Dexter Uy han Catbalogan City an gisasyahani nga hitaas nga opisyal denhi ha Eastern Visayas nga natapnan han Covid-19.
Mismo hi Uy an nagbuyagyag hini nga iya kahimtang kagab-i katapos la niya makarawat an impormasyon tikang ha DOH nga usa hiya han 97 nga taga Region 8 nga bag-o nga natapnan han ginkakahadlukan nga kagaw.
Dida han iya pahayag ha social media, nagsumat an 26-anyos nga alkalde nga nag-antos hiya hin hiranat, kawara han pagnanam han dila, deri nakakabaho ngan mag-ol-ol nga kaluluthan. Sering pa niya nga waray gud hiya magdadahom nga matatapnan hiya kay duro an iya paghinirot pero natapnan la gihapon hiya.
Hapagkayana, hiya in temporaryo nga nag-kwarentina ha Covid Ligtas Center han LGU. Iya gin-esplikar nga nagdesisyon hiya nga didto mag-kwarentina han Isolation Facility han LGU basi igpakita ha publiko nga deri hiya magpipili hin lugar basi mag-kwarentina. Karuyag niya magin ehemplo han iya basasakupan nga deri hiya nag-i-inarte bisan kun hitaas an iya posisyon.
Kasumpay hini, utro nanawagan hi Uy ha mga Catbaloganon nga doblehon an paghirot ngan deri na magkinagawas han ira panimalay basi deri na magsarang an virus ha ira lugar. Pira na nga barangay ha Catbalogan an iginbutang ha Enhanced Community Quarantine tinikangan kakulop basi kabalabgan an paglarab han kagaw.
Kagab-i, may nahidugang nga 53 nga Covid Positive ha Catbalogan ngan kadam-an ha ira an mga health personnel. Haros 100 na an Active Cases han Covid didto han syudad hapagkayana. #
