Isumat.com/3:10PM, July 9, 2020

Dako an paglaum ni Mayor Alfred Romualdez nga magigin produktibo ngan utro makakatindog an ekonomiya han Tacloban sugad man an Region 8 tikang han epekto han COVID-19. Ini an gintagan hin duon ni Romualdez dida han iya pakig-istorya han mga taga-media yana nga kulop (Hulyo 9).

Nagsering an alkalde han Tacloban nga haros ngatanan na nga klase han negosyo ngan mga establisemento an gintugutan pag-abri basta sumunod la han mga patakaran basi kalikyan an paglarab han kagaw. Kasumpay hini, pinasalamatan niya an mga taga Taclobanon ug an publiko han ira kooperasyon.

Igindugang pa ni Romualdez nga basta nagbuburublig an ngatanan nagigin mabinungahon an resulta, amo ini nga nagigin maribhong na an pan-negosyohan ngan iba pa nga pakabuhi. Kun waray disiplina ha aton deri ini matatabo, sering pa han amay han syudad.

Iya pa iginpahayag nga kinahanglan an pagburublig ngan pagsunod han mga aludayday kay deri akos han gobyerno nga maghinatag hin ayuda ha katawhan ha ngatanan nga panahon.

Iginpabati gihapon niya nga malipayon hiya nga nakatalwas na ngatanan an mga Positive Cases ha Tacloban. Pero nagpahimatngon hiya nga deri tumagya, labi na gud nga tutugutan na liwat nga maka-uli an mga na-stranded nga katawhan ha iba nga lugar.

Subay han nakalista ha Balik-Tacloban Program, haros 200 Locally Stranded Individuals an mabalik nganhi han syudad yana nga Hulyo.

Ini nga magkakabalik in deri ngatanan igpapailarum hin swab testing. Nagsering hi Romualdez nga an mga LSI la tikang han lugar nga damo an infection an kukuhaan han swab test sugad man kun mayda mga sintomas han virus. Pero igindig-on han alkalde nga igpapatuman para han ngatanan an istrikto nga pagsunod han porlomenos duha ka semana nga kwarentina. #