Isumat.com/3:58PM, Septembre 01, 2020
Arestado an usa nga maestra ug an iya kaupod dida han gindumara nga buy-bust operation han mga tinubyanan han balaud ha Calbayog City yana nga adlaw, Setyembre 1, 2020.
Ginkilala an mga suspetsado nga hira Jingle Montalban, ug an iya kakuntsaba nga hi Lilian Rose Vargas. Sumala han report, hi Montalban in usa nga maestra ha pampubliko nga eskwelahan ha Samar ngan ginkokonsiderar nga High-Value Target.
An mga operatiba han PDEA-Region 8, PNP Samar ngan Calbayog PNP an naghimo han operasyon kun diin nakapalit ngan nakumpiskar tikang han mga suspetsado in pito ka sachet hin gintotoohan nga shabu. Ini in may kabug-aton nga 10 gramos ngan ginbanabana nabalor hin 70 Mil pesos.
Hi Montalban ug hi Vargas in maatubang hin mga kaso kasumpay han ira pakatalapas han mga probisyon han Republica Acta 9165.
