Isumat.com/Hulyo 22, 2021

Hi Leyte 4th District Representative Lucy Torres-Gomez in makikigpa-isan-isan para hin lingkuranan ha senado dida han tiarabot nga 2022 Elections, pahayag ni Senate President Tito Sotto III.

Iginbuyagyag ni Sotto nga mayda na go-signal han pagkandidato ni Torres-Gomez ngan hiya in magigin kaparte han senatorial line-up han Nationalist Peoples Coalition (NPC).

Hadin nag-agi nga adlaw, iginpasamwak ni Senador Ping Lacson nga madalagan hiya ka presidente dida han pinili-ay samtang hi Sotto an iya running-mate.

Kun manunumduman, hadin nakalabay nga bulan, iginpabati ni Torres-Gomez nga abri hiya han posibilidad pagkandidato ka senador. Matuod, iya ginklaro nga deri lakip han iya ambisyon nga magin senador, pero kun may oportunidad para hini, tatagan niya ini hin konsiderasyon.

Ini nga pahayag han kongresista in tarihas han nagin anunsyo han iya mister nga hi Ormoc City Mayor Richard Gomez mahitungod han ira mga plano para han eleksyon. Han magsa-urog han iya kaadlawon an alkalde tulo na ka bulan an nakalabay, iya iginpahayag nga hi Lucy in madalagan ka mayor han syudad, samtang hiya in makandidato para han lingkuranan ha kongreso nga babayaan han iya misis.

Hi Lucy in aada yana han ikatulo ngan pinal nga termino komo kongresista, samtang hi Mayor “Goma” in nagseserbe han ikaduha niya nga termino komo amay han Ormoc.

An iba pa nga kaapi han senatorial slate han NPC amo hira anay senador Loren Legarda, Chiz Escudero, JV Ejercito ngan Gringo Honasan; an mga re-electionists nga hira Dick Gordon, Sherwin Gatchalian, Joel Villanueva ngan Migz Zubiri; ug hi anay Comelec Commissioner Gregorio Larrazabal.

Tobtob han ginsusurat ini nga notisya, hi Torres-Gomez in waray pa maghatag hin reaksyon kasumpay hini nga pahayag ni Sotto. # (with report from Inquirer.net)