Isumat.com/3:15PM, June 8, 2020

Harayo an posibilidad nga mag-implementar utro hin lockdown ha syudad han Tacloban. Ini an igindig-on ni City Mayor Alfred Romualdez ha iya pag-atubang han local media kanina han udto.

Hadin nagi nga pira ka adlaw, nagsarang an mga iru-istorya ha social media ngan mga hurobhurob han publiko nga igbubutang ha lockdown an syudad dara han pakasulod han corona virus kun diin duha na ka tawo an nagpositibo ha Tacloban.

Nagsering hi Romualdez nga imposible ini matabo nga lockdown labi na kay duha man la ini ka tawo ngan mag-upay pa gud an kahimtang han ira panlawas. An usa hini in nag-negatibo na ngani ha Repeat Testing ngan puede na ha ira balay tapuson an kwarentina.

Ginklaro gihapon han alkalde nga an natabo nga lockdown ha Cabalawan in epektibo la hin 24 oras kay para la adto han contact tracing han syahan nga Positive Case han syudad.

Kadungan hini, nagpahayag hi Romauldez nga abri an syudad pagkarawat han magkaka-uli pa nga mga residente ngan OFWs. Sering niya, waray problema hini, an importante la amo an pagsunod hin hingpit han mga health protocols basi ka-ibitaran an pakatapon han kagaw.

Ini nga pagpabalik han mga residente in kamanduan han National Government sanglit kaangayan la nga sundon naton ini, pahayag pa han opisyal. Iya pa igindugang nga katungod hini nga mga molopyo an bumalik ha Tacloban kay aanhi an ira pamilya ngan pakabuhi.

Iginpahayag pa niya nga kinahanglan sundon gihapon an Bawal-Angkas ha motorsiklo kay amo ini an iginlalarang han balaud. # (KEVIN SIOSANA)