(File photo disrespect1st.com)

Isumat.com/9:10AM, June 6, 2020

Dako nga kabido-an an gin-aantos yana han pamilya, kasangkayan, mga kaklase, ngan ka-urusa ha basketboll dara han tigda nga kamatay ni ni Nichk Lorenz Advincula kakulop han udto dara hin aksidente ha kalsada.

Subay han spot report han Tolosa, Leyte-PNP, kakulop han alas 12:15 han udto, an 20-anyos nga hi Advincula in nagmamaneho hin motorsiklo ha national highway han Brgy San Roque kun diin hiya an Chairman han Sangguniang Kabataan. Angkas niya ha motorsiklo an iya kabarangay nga hi Fe Umbal, 19 anyos.

Nagmamalatumat an report nga dida han kurbada nga parte han highway, ira iginkatapo in usa nga Suzuki Pick-up nga may plate number JCN 410. An pick-up in gin-aalegar nga kumabat ha linya han motorsiko hinungdan nga nagsampakay an duha nga behikulo.

Nag-antos hin magkalainlain nga injury ha lawas an duha nga sakay han motorsiklo ngan kadagmitan gindara ha usa nga hospital ha Palo. Binawi-an han kinabuhi hi Advincula, samtang kritikal an kahimtang ni Umbal.

An driver han pick-up nga hi Gerard Almaden, 31 anyos han LaPaz, Leyte in waray gin-antos nga karamtan ha lawas ngan gindara ha Tolosa PNP Station.

Labot la han iya pagin SK Chairman, hi Advincula in ma-3rd year na unta ha Leyte Normal University ha kurso nga BS-Hotel Management. Kaapi gihapon hiya han Mens’ Basketball Team nga LNU Huskies.

Sumala han iya mga kaklase, kasangkayan ngan ka-urusa ha basketball, hi Advincula in puno hin pagrespeto ngan pirmi nagpapakita hin positibo nga pamatasan. Ha sulod han klase ug ha basketball court, hiya in disiplinado ngan matatapuran ha bisan ano nga responsibilidad nga iginhahatag ha iya. # (KEVIN SIOSANA)