An mga operatiba han CIDG-Eastern Samar samtang gin-i-imbentaryo an mga pusil ngan bala nga nakuha tikang han suspetsado. (Photo by CIDG-E. Samar)

Isumat.com/9:54AM, Mayo 10, 2021

Ginlalauman nga makakagdurot hin pag-iban han mga panhitaboi hin krimen ha Eastern Samar an kadakop han lider hin sindikato han “Gun-for-Hire” ngan Gun-Running didto han nasabi nga probinsya.

Dida han report nga nahikay han Isumat.com tikang ha Criminal Investigation and Detection Group (CIDG-Eastern Samar Field Unit) ginkilala an suspetsado nga hi Edgar Ellardo Busa, 37 anyos, residente han Brgy Omawas, Maydolong, Eastern Samar. An gintatahapan an gintutudlok nga namumuno han “BUSA Group” nga nadadabi hin iligal nga pamaligya hin armas ngan panmatay.

An mga operatiba han CIDG-E. Samar ha panguna ni PMajor Glenn Aculana an hingpit nga nag-alinsusunod han mga gi-os han grupo ngan nakakuha hira hin search warrant ha RTC-Branch 2 ha Borongan City. Tungod hini, ginronda han mga tinubyanan han balaud an balay ni Busa ug didto nadiskubre an hinipos nga mga armas ngan kadam-an nga mga bala hin magkalainlain nga armas de fuego.

An mga nakumpiskar tikang kan Busa amo an masunod: usa nga K-G9 nga pusil nga mayda silencer, 10 nga bala hin 9mm Lugger, 13 nga bala hin 9mm, duha nga magazines, 8 nga kalibre .45, ngan mga papeles.

Dida han panmaki-ana han Isumat.com kan Major Aculana, iginpahayag han opisyal nga an grupo ni Busa in mayda operasyon ha Borongan, Balangkayan ngan Maydolong. Iya pa iginsumat nga mayda lima nga miembro an sindikato.

Igindugang gihapon han opisyal nga bag-o ini nga grupo nga naghihimo hin iligal nga operasyon ha Eastern Samar.

Samtang ginsusurat ini nga notisya, hi Busa in iginpapa-ilarum hin Inquest Procedure han Provincial Prosecutors Office. Iginsampa an kaso nga pakatalapas han Republic Act 10591 o tinatawag nga Comprehensive Firearms and Ammunition Regulations Act. An piskaliya in nagrekomendar hin 280 Mil pesos nga piyansa.

Padayon an imbestigasyon han CIDG hini nga insidente ha panuyo nga masikmit gihapon an iba pa nga kaapi han sindikato. #