Isumat.com/Agosto 22, 2022
Mabulig na an mga lokal nga pangobyernuhan ha DSWD ha pagdistribuer han ayuda pinansyal para han mga estudyante nga naghihimakuri.
Yana nga aga, Agosto 22, iginpasamwak ni DSWD Secretary Erwin Tulfo nga naghihimangraw na yana an iya ahensya ug an DILG han mga pamaagi basi magin hapsay an sistema han panhatag.
Tinikangan hiton maabot nga Sabado, Agosto 27, 2022, magigin kasugbong na han DSWD an mga LGUs ha panhatag han Education Assistance, sering pa ni Tulfo.
Kun manunumduman, nagin bugi-ot ngan may pira nga insidente hin deri pagkasarabot han syahan nga adlaw han panhatag han ayuda tungod han duro kadamo han katawhan nga pumakadto ha mga buhatan han DSWD basi mag-apply para han nasabi nga ayuda.
Sumala kan Tulfo, panuyo niya nga magin harani ngan masayon para ha mga benefeciario an pagkuha han pondo, sanglit hihimoon na an panhatag ha tagsatagsa nga mga bungto ngan syudad.
Utro gihapon nga iginpahayag han opisyal nga babawion an ayuda nga naihatag na hadton syahan nga Sabado ha mga kaapi han 4Ps kay deri hira lakip hini nga hinabang. Ini in pinaagi han pag-iban hin porlomenos 500 pesos ha kada bulan nga ira benefecio.
Denhi ha Eastern Visayas, sobra Dos Mil nga mga estudyante an nakakarawat han ayuda financial hadton Agosto 20. Ini in magpapadayon an panhatag tobtob hiton Setyembre 24, 2022.
Naghahangyo gihapon an ahensya ha publiko nga manginano anay ha FB Account han DSWD para hin kadugangan nga impormasyon antis an sunod nga panhatag han ayuda. Adi an fb account : DSWD Eastern Visayas. #
