Isumat.com/9:03AM, August 03, 2020

Waray gud magdahom an usa nga lalaki nga an iya ginmayoyo nga igburulang nga manok amo mismo an mag-uutod han iya kinabuhi.

Sumala han report han Tacloban PNP, an biktima in ginkilala nga hi Avelino Lacambra, 81-anyos ngan residente ha Purok CCF, Barangay 99, Tacloban City.

Banda alas 8 kakulop han aga (Agosto 2) usa nga lalaki ha ngaran ni Dante Gacita an pumakadto han balay ni Lacambra dara-dara an iya manok nga igburulang. Gin-ayat ni Gacita an biktima nga magbulang hira tungod kay mayda man liwat manok hi Lacambra.

Dida hito, nagkasabot an duha nga pag-aasdangon an ira kamanukan. Pagbuhi nira han ira tagsatagsa nga manok, waray sumulong an manok ni Lacambra ngadto han iya ka-atbang. Ginsagparakan ngan ginpuruput-an lugod han manok an iya agaron.

Hinungdan hini, hi Lacambra an naigo han matarom nga tadi dida han iya wala nga paa. Kadagmitan nga gindara ha EVRMC an biktima pero igindeklarar nga Dead on Arrival han doktor nga nag-atender ha iya. #