Isumat.com/7:23AM, Pebrero 18, 2021

Nagkikita la unta han tupada pero nahingadto ha trahedya an dinangatan hin usa nga lalaki han lumukso hiya ha salog han pagrondahan han kapulisan an iligal nga pagpabulang ha usa nga barangay ha Catarman, N. Samar.

Dida han notisya han Northern Samar News and Information, an biktima in ginkilala nga hi Jenner Cahusay alias Yoyo, 31-anyos, parag-uma, inasaw-an, ngan nag-uukoy ha Sitio Basud, Brgy Dona Polquiria, Catarman.

Sumala pa han impormasyon, an patay nga lawas han biktima in natad-an ha Brgy Galutan han mao nga bungto. An lawas ni Cahusay in nakit-an han residente ngahi Selencio Lago nga nalutaw didto han salog.

Hadton Domingo nga adlaw, nahisumat nga nagtupada didto han lugar han biktima ngan hiya in nagkita han burublang. An mga kaapi han Catarman PNP in nagronda han nasabi nga aktibidad labi na nga iginederi ini yana nga may pandemya.

Nag-warning shot an mga otoridad hinungdan nga nagkaplag an mga katawhan nga nakadto han tupada. Sugad-sugad nga nalisang hi Cahusay ngan ha iya paningkamot nga maka-eskapo, lumukso hiya ha salog.

Gintotoohan nga nalumos an biktima kay subay han nakakakilala ha iya, deri hiya maaram paglangoy.

Samtang, ha iba naman nga panhitabo, temporaryo nga ginsuspender an retrieval operation han nawara nga lalaki ha kadagatan han Palo, Leyte tulo na ka adlaw an nakalabay. Nagdesisyon an MDRRMO han bungto nga undangon an pamiling kan Arian Pelisores nga taga Alangalang, Leyte.

Hi Pelisores ug an iya grupo in nangarigos didto han lugar hadton Domingo ngan subay han pag-asoy han iya kaupod, nakit-an nira nga nagtitikalumos an biktima. Hi Pelisores an gindeklarar han mga rescuers nga missing tobtob yana. #