Isumat.com/Oktubre 11, 2022
Nagpapadayon an pagkolekta hin mga medalya han Taclobanon nga hi Kurt Gonzales Pajuelas ha larangan han taekwondo.
Hi Pajuelas in naka-angkon han Gold Medal dida han Men’s Bantamweight Division han gindumara nga 2022 Smart MVP Foundation Nat’l CPJ Taekwondo Championships ha Manila hadin Oktubre 8-9, 2022.
Ngatanan han iya upat nga iginka-asdangay tobtob han Final Match an iya ginlapingka, paprehas 2-0 an score. Syahan nga iya ginperde ha Round od 16 an taga University of the Philippines; ha Quarterfinals ginpaluhod ni Pajuelas an pambato han University of Sto Tomas; taga UST gihapon an iya ginlampaso ha Semis, ngan dida han Finals waray makaporma an anay kaapi han RP Team kan Pajuelas.
Hi Kurt in kaapi han National Team ngan iya gintaglawasan an National University kun diin hiya in na-eskwela.
Pira na ka beses nga naghakot hin gold hi Pajuelas dida hini nga torneo han nag-agi nga mga tuig. Naka-angkon na gihapon hiya hin mga medalya ha mga international tournaments.
Dida hini nga iya pakadaog, an taga V&G Subdivision han Tacloban nga hi Pajuelas in nagpasalamat ha Makagarahum, ha iya pamilya, mga coaches ngan mga ka-urusa nga players han unibersidad. #
