(Photos by Calbayog City PNP)

Isumat.com/3:06PM,May 19, 2020

Nagpahimatngon an Calbayog City PNP ngadto han nagdudumara han duha nga dagko nga malls han syudad nga mag-aatubang hira hin mga kaso ngan posible igpasara an mga tindahan kun deri magsunod han mga iginpapatuman yana nga health protocols kasumpay han COVID-19 pandemic.

An Calbayog PNP ha panguna ni Officer-in-Charge LtCol. Neil Montano, in nagdumara hin inspection han Super Metro ug an Gaisano Grandmall basi personal nga obserbaran an mga pitad han tagdumara ha pagpasunod han health protocols labi na gud nga nagtitikadamo na an katawhan nga nagkakasulod ha mga establisemento.

Ginpahinumdom ni Montano an mga Mall Supervisors nga istrikto gud nga ig-implementar an social distancing, pagsul-ot han face mask ngan pagkuha han temperatura han mga manmaralit.

Iya gihapon iginsagdon nga deri hingalimtan an pagkaada hin hand washing area, foot bath ha entrance han mall, ngan pagka-ada hin holding area basi deri maghuro-ot ha sulod han mall an mga tawo.

Kun deri magsunod han nasabi nga mga guidelines, papatukan han kaangayan nga sirot an mao nga mga establisemento nga puede magdalan han pagsarado hini.

Dida han pagbulkas han General Community Quarantine ug nahimo na ini nga Modified GCQ, na-obserbaran nga nagtikadamo na an katawhan nga nakakagawas ha ira panimalay ngan napakadto ha magkalainlain nga lugar sugad han malls.

Nababaraka yana an mga health authorities nga bangin magkaada hin tigda nga pagtikadamo han Positive Cases dara han pagtugot nga makagawas an katawhan, deri parehas han una nga tag-usa la kada panimalay an puede makagawas para pumalit han mga panginahanglan.

Kun aton manunumduman, an ikaduha nga Positive Case ha Eastern Visayas in taga-Calbayog City, pero naka recover na hiya ngan waray nag positibo han iya mga close contacts ha Calbayog. Pero hiya an gintoto-ohan nga nagdara han virus ngadto ha Tarangnan, Samar kun diin hiya nagtatrabaho ug umabot na hin 21 ka tawo hito nga bungto an natapnan han corona virus. # (KEVIN SIOSANA)