Isumat.com/Pebrero 8, 2022

“Bubuhaton han akon mga pangontra an ngatanan basi deri ako makalingkod komo Bise-Gubernador, upod na an pagkuha han akon kinabuhi.”

Ini an madig-on nga pahayag ni Atty Alma Uy, konsehal han Catbalogan City, ngan kandidato yana ka Vice-Governor han Samar ha social media kakulop, Pebrero 7, 2022.

Bisan kun waray niya ngarani kun hin-o o ano nga grupo, ginbansagan ni Uy an nakontra ha iya nga usa nga “Dynasty” ngan maiha na nga deri niya iginkaka-uyon.

Kadungan hini, igintutubyan niya ha mga kamot han Samarnon an pagdesisyon kun masugot ba hira nga an magigin Presiding Officer han Sangguniang Panlalawigan usa nga taga-Masbate, o titipahan ngan babalabgan ini nga mga grupo nga gutom hin poder.

Igindig-on pa han abogada nga an iya mga ka-atbang in deri mag-aalang pagpatay basi an Samar ug an karikuhan han probinsya in magpabilin ha mga kamot han mao nga hugpo.

Ini nga iya pahayag ha social media in gumawas usa ka adlaw tikang matabo nga panmatay ha Sta Margarita, Samar hadton Pebrero 6 kun diin tulo ka tawo an naawat an kinabuhi. Gintutudlok nga political supporters ni Emil Zosa an mga biktima.

Hi Zosa in nadalagan ka alkalde han Sta Margarita kun diin incumbent Mayor an iya misis nga hi Gemma. Hi Gemma in tig-sering naman ka Gubernador han Samar ug an iya running-mate hi Uy.

Sumala kan Uy, nakaka-abat hiya han kabido-an han mga binayaan nga pamilya han mga biktima, ngan ini nga panhitabo in mas nakagpakusog han iya paningkamot nga makadaog ha eleksyon.

Hi Uy in nagin Boardmember han probinsya antis hiya magin konsehal han Catbalogan. Antis hiya sumulod ha pulitika, nagserbe gihapon hiya komo huwes ha husgado.

Hi Gemma Zosa in makikiglantugi kan Samar 2nd District Rep Sharee-Ann Tan pagka-gubernador, samtang hi Arnold Tan naman an ka-atbang ni Uy. #