Isumat.com/3:58PM, July 26, 2020
Nagkasurapo an mga tropa nga kaapi han 78th Infantry (Warrior) Battalion kontra han mga rebelde nga kumunista kakulop han aga ha Brgy Pinanag-an, Borongan City, Eastern Samar.
Subay han notisya tikang ha Philippine Information Aagency-8, an mga kasundaluhan in nagpapatrolya didto han nasabi nga lugar dara han reklamo han mga residente han pandelihensya han mga rebelde. Iginka-pusilay an mga tropa han gobyerno kontra hin porlomenos pito nga NPA.
Humagos hin pira ka minutos an balyu-ay hin bala pero nangiskapo an mga rebelde ug ira nabayaan in duha nga granada, mga bala hin M16, subersibo nga mga dukumento ngan personal nga mga higamit.
Iginsumat han Philippine Army nga kinakapoy na an mga baryuhanon han pagtarhog ngan pangaro ha ira han mga rebelde. Lakip han ginkokolekta han mga kumunista in usa ka gantang hin bugas ha kada para-uma, 5 ngadto ha 50 pesos kada pamilya ha kada bulan ngan bisan an bilanghoy ngan kamote in ginkukuha gihapon han mga rebelde.
An 78th IB ha panguna ni LTCol Oliver Alvior in nagpap[asalamat ha mga baryuhanon han ira kooperasyon ngan pagsumat han presensya han mga rebelde. Sering pa ni Alvior, an gobyerno in deri magruruhaduha paggamit hin pwersa basi masupil an nagsasamok ha mga kumunidad.
