Isumat.com/9:48AM, May 27, 2020
Mahugot nga ginkondenar han grupo nga Katungod Sinirangan Visayas an nahitabo nga pagpatay kan Allan Aguilando, usa nga lider han mga parag-uma ha Northern Samar.
Sumala han pahayag han grupo, an mga elemento han 803rd Infantry Brigade an nagpapaluyo han pagpataya kan Aguilando nga mas kilalado nga Mano Boy ha iya komunidad. Hi Aguilando in residente han Brgy New Rizal, Catarman, Northern Samar ngan presidente han Northern Samar Small Farmers Association.
Nag-akusar an Katungod Sinirangan Visayas nga an mga kasundalohan amo an nagpusil ngan nagpatay kan Aguilando kakulop nga adlaw.
Sumala han impormasyon, hi Aguilando in maiha na nga nangungulo han grupo han mga para-uma ha ira probinsya kun diin an panuyo amo an pagpaka-upay han kabutangan han ira sektor. Kaupod hiya han mga mag-uuma nga nagmartsa ha Manila basi manawagan ha gobyerno hin kadagmitan nga ayuda para han mga umhanan nga nadistroso han kalamidad.
Igindugang pa han grupo nga hi Aguilando in maiha na nga gintinarhogon han militar nga nagtudlok ha iya komo kaapi daw han rebelde nga New Peoples Army.
Sering pa han grupo nga imbes nga maniningkamot an gobyerno ha pagpa-uswag han agrikultura, gintatarhog lugod ngan nagdudumara hin pagtalapas han katungod pantawo an militar kontra han mga kablasanon.
Subay naman han report han 803rd Brigade, namatay hi Aguilando dida hin enkwentro kontra han mga sundalo ha Brgy Rizal. Hi Aguilando in kaupod daw hin iba pa nga rebelde nga nagpipinanhadlukon ngan nangangaro hin kwarta ngan pagkaon tikang han mga baryuhanon.
Nagsering pa an militar nga an namatay amo an secretaryo han Sangay ng Partido sa Platon Sub_regional Committee Emporium. Nakuha tikang kan Aguilando in kalibre 45 nga pistola.
Hi Lt Col. Raymund Picut, Commanding Officer han 43rd Infantry Batallion an nagdayaw han iya mga tropa ngan nagpasalamat ha mga residente han barangay dara han paghatag hin impormasyon kasumpay han aktibidadis han mga rebelde. # (KEVIN SIOSANA)
