Isumat.com/8:20AM, May 15, 2020

Usa nga Kapitana hin barangay ha Tacloban City in nagpa blotter ha Police Station han iya alegasyon nga gin-iikalirigis hiya pinaagi hin motorsiklo han iya ginsaway nga residente han iya barangay mahitungod han pagpasunod han mga health protocols yana nga may krisis han corona virus.

Subay han record han Abucay PNP Station, hi Trinidad Dumas, 71 anyos, Kapitana han Barangay 104-Salvacion, in nag reklamo nga gin-iikalirigis hiya ni Allan Trinado nga residente han barangay.

Dida han blotter, natabo ini nga insidente kakulop han mga alas 9 han aga. Antis ini nga insidente, hi Dumas in nakakarawat hin impormasyon nga didto han bilyaran nga gintatag-iyahan ni Trinado, deri napapatuman an social distancing ngan pagsul-ot hin face mask.

Hi Kapitana, upod in pira nga opisyal han barangay ngan mga pulis in pumakadto han bilyaran ug ira gud man nakit-an nga tinood an impormasyon. Mahitungod hini, ginsaway ni Dumas hi Trinado ngan ginsagdunan nga igpatuman an mga aludayday han kwarentina.

Katapos hini, lumakat na hi Kapitana ug an iya grupo kay ha ira pag-abat klaro man an ira abiso ngada han tag-iya han bilyaran.

Dida han pag-asoy ni Kapitana, han harani na hiya ha iya balay, tigda nga umulpot hi Trinado sakay hin motorsiko ngan duha ka beses nga naghagyo ini nga liligson an opisyal han barangay. Dara hini nga gi-os ni Trinado, nag desisyon hi Kapitana nga igpa blotter ha Police Station ini nga panhitabo. # (KEVIN SIOSANA)