Nahipaslak ha karsel ngan naatubang yana hin mga kaso in usa nga lalaki nga gin-aalegar nag-iikaparatay hin usa nga Barangay Chairman ha Basey, Samar.
Ginkilala an suspetsado nga hi Narciso Badajos alias Inar, 57 anyos, parag-uma, ngan nag-uukoy ha Brgy Sugponon han nasabi nga bungto, samtang an iya gin-iikatirigbas amo hi Joel Badajos, 51 anyos,an kapitan han nasabi nga barangay.
Sumala han inisyal nga imbestigasyon, dida han Abril 13, hi Kap Joel upod an mga opisyal han barangay ngan mga tanod in nagdudumara han COVID -19 assistance desk ha ira lugar, han tigda nga umulpot an suspetsado nga may dara nga sundang ngan titigbason na unta an kapitan pero napudngan ini han mga tanod.
Hinungdan hini, waray magmalinangpuson an maraot nga plano han suspetsado. Nagreport an punong-barangay ha Basey PNP nga kadagmitan naman nag-aresto han suspetsado. Maatubang hin mga kaso nga attempted murder ngan direct assault an suspetsado.
Usa han ginkikitakita nga posible nga motibo han panhitabo in personal nga deri pagka-asya ha butnga han suspetsado ngan kapitan. #
(Posted 8:43 AM, April 15, 2020)
