Isumat.com/Agosto 22, 2022
(1st UPDATE as of 4:56PM, Aug, 22, 2022) May natabo nga engkwentro ha butnga han militar ngan armado nga grupo kanina han maagahon ha kadagatan nga sakop han Catbalogan, Samar. Ini an ginkumpirmar han Philippine Army 8th Infantry Division.
Ginpabuthan han mga sakay han motorboat an militar han magpasabot an mga kasundaluhan nga maghihimo hira hin inspection. Hinungdan hini, bumulos liwat pagpabuto an tropa han gobyerno.
Dida han engkwentro, tigda nga bumuto an motorboat han armado nga grupo. Nagsering an militar nga tobtob yana, ira pa ginpapaningkamutan nga matudlok an pangilal-an han mga sakay han motorboat.
Waray gihapon kumpirmasyon an 8th ID kun sakay gud man han mao nga motorboat an mga lider han NPA nga mag-asawa nga Tiamzon.
Pasado alas 10 kanina han aga, nagsarang in usa nga “spot report” kun diin iginmalatumat nga na-“neutralize” han militar an Tiamzon couple.
(11:03AM, Aug 22, 2022) An mag-asawa nga hira Benito ngan Wilma Tiamzon, ngaduha higtaas nga lider han CPP-NPA-NDF ngan maiha na nga wanted tungod hin damo nga kaso in na-“neutralize” kanina han maagahon, Agosto 22, 2022 ha Catbalogan City, Samar.
Subay hin usa nga “spot report”, an mga tropa han Joint Special Operation Task Force Trident ngan Intelligence Service han AFP an iginkahibalag han duha nga lider samtang sakay ini hira hin motorboat nga matabok unta tikang ha Brgy Guti ngadto ha Brgy Buri pasado alas 4 han maagahon.
An mag-asawa nga Tiamzon in upod hin napulo nga armado nga kalalakin-an nga gintotoohan miembro han rebelde nga NPA.
Upod nira Tiamzon hi Joel Arceo alyas Divino, Secretary General han Sub Regional Committee Emporium han mga rebelde ha Eastern Visayas.
Nagkamay-ada hin balyu-ay hin bala an magkaluyo nga panig, ngan nagkaada hin pagbuto ha motorboat han mga rebelde hinungdan nga nalunod an sarakyan nira Tiamzon.
An IsumatNews in padayon nga naghihikay hin kadugangan nga detalye hini nga impormasyon basi maklaro kun ano, hain na yana, ngan ano an sitwasyon han mag-asawa nga Tiamzon.
Hi Benito in usa nga consultant han NDF ngan Vice Chairman han han grupo, sugad man gihapon kaapi han Executive Committee; samtang hi Wilma an Secretary General ngan Executive Committee member han NDF.
Naaresto na hira hadton 2014, pero nakagawas hadton 2016 han magkaada hin peace talks ngan himoon hira nga consultants.
Han waray na igpadayon an peace talks hadton 2017, waray hira magsurender ngan nagtinago na.
Na konvictar na hira hadton Nobyembre 2020 hin kaso nga kidnapping ngan serious illegal detention.
Kadam-an pa nga kaso hin murder ngan frustrated murder an gin-aatubang han mag-asawa nga Tiamzon ha magkalainlain nga parte han Pilipinas. #
