Northern Samar 1st District Cong, Paul Daza

Isumat.com/7:45PMl, August 26, 2020

Positibo han Covid-19 hi Congressman Paul Daza, an representante han syahan nga distrito han Northern Samar.

Mismo hi Daza an nagpasamwak hini temprano pa yana nga gab-i. Nagsering an kongresista nga gumawas an positibo nga resulta han iya swab test kakulop ngan hapagkayana aadto na hiya naka-confine hin usa nga hospital.

Hadton Agosto 8, nagbiyahe hi Daza tikang ha Manila ngadto han iya distrito ha Northern Samar pero antis hiya umuli nagpa-swab test anay hiya ha Manila ngan negatibo an resulta hini. Pag-abot niya ha Northern Samar, naglibot-libot hiya han mga munisipalidad nga iya nasasakupan basi manginano han kahimtang han mga mulopyo sugad man an iya mga proyekto.

Dida hini nga iya pagsudoy-sudoy iginka-urusa hiya han mga lokal nga opisyales sugad man an ordinaryo nga mga bungtuhanon nga posible nagdadara han kagaw.

Dida han Agosto 16, naka-abat hiya hin deri maupay ha iya panlawas. Sanglit nagdesisyon hiya nga deri na gumawas ha ira panimalay ha Brgy Daganas, Catarman. Tikang hadto, mayda na niya gintumar nga medisina pero nagpadayon nga waray pag-uupay an iya inaabat.

Hinungdan hini, sumugot hiya han sagdon han mga doktor nga pumakadto ha Manila basi maseguro kun ano gud an iya sakit, ngan didto na nag positibo han Covid an iya swab sample.

Kasumpay hini, iya na minanduan an iya mga empleyado nga magpailarum hin kwarentina ngan magbuhat hin contact tracing an mga otoridad han panlawas.

Ginpatapod ni Daza nga magpapadayon an iya pagserbe ha iya nasasakupan bisan kun adto hiya ha hospital.

Hi Daza an ikatulo nga prominente nga pulitiko ha Eastern Visayas nga natapnan han Covid. Naha-una nga nagpositibo an magbugto nga hira Catbalogan City Mayor Dexter Uy ug Konsehal Stephanie Uy-Tan. #