(File photo)

Isumat.com/7:13AM, Abril 13, 2021

Natabo kakulop, Abril 12, 2021 in magkalain nga insidente hin pagbuto ha bungto han Tanauan, Leyte ngan Department of Health Regional Office .

Dida han inisyal nga imbestigasyon han Tanauan PNP, gintotoohan nga explosive device an bumuto ha sulod hin usa nga balay ha Brgy Buntay, Tanauan kagab-i. An mao nga balay in gintatag-iyahan ni Meldrid Lopez Magno, 54 anyos.

Nagpahayag an mga imbestigador nga waray nasamad o nagkaada hin karamtan ha lawas dida han insidente ngan padayon an ira pagsusi basi matudlok an nagpapaluyo hini nga pagbuto.

Samtang, usa naman nga kotse nga nakaparada ha compound han DOH Regional Office ha Candahug, Palo an nasunog han mayda bumuto ha sulod han sarakyan kakulop han tika-urudto.

An nasabi nga sarakyan in gintatag-iyahan hin usa nga personel han canteen han DOH. Subay han panguna nga imbestigasyon, posible nga mayda bumuto ha sulod han sarakyan dara han duro kamapaso nga sirak han adlaw. An sarakyan in naglalahinggab ngan naugbaw.

An Bureau of Fire Protection in nagdudumara hinb imbestigasyon han nasabi nga insidente kun diin waray nahireport nga nagkaada hin injury. #