Isumat.com/8:12AM, Enero 29, 2021
Klaro ngan sugad-sugad hin waray kahadlok an mga nagdudumara han iligal nga pagpataya hin numbers game ha pira nga bungto ha Eastern Samar, ngan ini in nakakapi-ang han tinood nga nagkakapot han prangkisa han PCSO nga amo an ligal nga nagpapadalagan han mulay didto han probinsya.
An Systems Development & Ventures orporation (SDVC) nga may opisina ha Amistoso Bldg, Alangalang, Borongan City in nagpadangat hin surat ngadto han pamunuan han PCSO basi igreklamo an operasyon han iligal nga pagpataya hin pira nga indibidiwal ha pira nga munsipalidad.
An SDVC amo la an mayda otoridad pagdumara han pagpataya ha Eastern Samar han Small Town Lottery (STL). Ini nga korporasyon in naghahatag hin kada bulan nga revenue ngadto ha PCSO nga gingagamit han mga programa han PCSO ilabi na gud ha pagbulig han mga kablas. Tungod hini nga iligal nga operasyon, apektado an operasyon han SDVC ug an mga lehitimo nga PCSO Lotto Outlets. Madadarahigan gihapon an mga progrma han PCSO tungod hini nga deri nasusubay ha balaud nga binuhatan hin pira ka tawo, pahayag pa han korporasyon.
Dida han surat, iginbuyagyag han SCVC nga nakakarawat hira hin mga reports tikang ha publiko ngan tikang han ira opisyal nga Sales Supervisors and Representatives mahitungod han iligal nga pagpataya. Ini nga mga report an ira naberipikar kun diin mayda mga tawo nga nagdudumara han iligal nga pagpataya han 3-Digits, Swertres ngan Pick 3. An korporasyon in nagsubmiter hin mga ebidensya ha PCSO nga ginlalakipan hin mga aktuwal nga betting slip, mga papeles, ngan mga ngaran han mga iligal nga nagpapataya.
Subay dida han dokumento nga nahikay han Isumat.com. ha Borongan City mayda usa nga Financier, usa nga Over-all Supervisor, tulo nga Coordinator, usa nga Sub-coordinator, ngan duha nga Ushers.
Nagsering pa an surat nga mayda gihapon Financier ngan Coordinator ha Arteche; mga Coordinator ha Can-avid Taft, ngan Sulat; ngan ha bungto han Oras, may duha nga Financiers, duha nga Coordinators, usa nga runner ngan tulo nga Ushers.
Nagsering pa an SDVC nga pira hini nga mga tawo in operators gihapon han igindederi nga “On-Line Sabong.”
An korporasyon in naghimo han ira kalugarungon nga panginano ngan ira nadiskubre nga an mga iligalista in nag-establisar han ira kalugaringon nga “Kabos” ngan “Kubradores”. Nagdadara hira hin peke nga stub o resibo basi maglipat-lipat han mga manmurusta. Labot la hini, nagpipinanhambog pa daw ini nga mga iligalista nga protektado hira han mga Local Officials ngan nasusubay ha balaud an ira operasyon.
Kasumpay hini, an korporasyon in nananawagan ha PCSO nga tagan hin kadagmitan nga aksyon ini nga kahimtang. An PNP Provincial Office in ginpadad-an gihapon han kopya hini nga surat.
An mga iligalista in deri naghihimo hin kalugaringon nga pag-bola o draw. Nakuha la hira hin mga resulta tikang ha PCSO, ngan ini in supak ha balaud. An SDVC in nakuha han resulta han STL ha fPCSO Cebu Official Draw kun diin mayda tinaglawas han PCSO.
An mga tinood nga Supervisor ngan Sales Representaives han SDVC in mayda mga Valid IDs, uniporme kun diin nakamarka an PCSO ug ngaran han korporasyon, ngan maghahatag hin Official Stub/Receipt.
Aadi an pira nga ebidensya nga nakuha han SDVC….upod na hini an mga peke nga stub ngan mga betting slip…
