Isumat.com/Setyembre 16, 2021
Kadagmitan nga hustisya an iginguguli-at han mga paryente han duha nga magbugto nga pinanmatay ha Gandara, Samar hadin Setyembre 11, 2021.
Dida han interview han Calbayog Journal kan Josephine Magbutay-Mendoza, nanawagan hiya ha lokal nga mga opisyales han gobyerno sugad man ha kapulisan nga buligan hira nga katagan hin hustisya an brutal nga pagpatay han iya kabugtu-an.
Kun manunumduman, an magbugto nga hira Felix ngan Jessie Magbutay in natad-an nga waray na kinabuhi hadton maagahon han Setyembre 11 ha Brgy Sta Elena, Gandara, Samar.
An magbugto in mga parag-uma ngan may tagsatagsa nga pamilya, ngan nag-uukoy ha Brgy Bislig han nasabi nga bungto.
Nagsering hi Josephine, nga nagkakarga la an magbugto hin kopra ngadto han ira baloto han tigda la magkaabot an mga suspetsado nga waray panhikilal-i ngan ginpa-arakan hin bala hira Felix ngan Jessie.
Napapa-usa an pamilya han mga biktima kun kay-ano nga matatabo adto nga waray man nira nasasabtan nga atraso o kaaway han magbugto ngan waray liwat hira panhidabi hin mga pamulitika.
Hadton Hulyo 21 hini nga tuig, mayda gihapon para-uma ha Brgy San Francisco, Gandara an ginpanmumusil hin lima nga suspetsado ngan ginpugot pa an ulo han biktima.
An Municipal Treasurer han Gandara in gin-ambush ngan namatay hadton Pebrero 21, 2021 samtang nagbibiyahe durante han kagab-ihon tikang ha Calbayog City tikado han mao nga bungto. # (with report from Calbayog Journal)
