Isumat.com/10:56AM, June 2, 2020

Haros duha ka bulan nga napayungan hin pagkabaraka an mga taga Burauen, Leyte dara han duha ka tawo tikang han bungto nga nag positibo han Covid-19. Pero ini nga duha ka tawo in hul-os na nga nakatalwas han sakit ngan nakabalik na ha ira panimalay.

Igindeklarar na ngani han DOH-Regional Office nga sarado na an kaso han duha ka tawo nga Positive Cases dida han bungto. Ini in subay han ira gindumara nga contact tracing ngan negatibo nga mga resulta han ngatanan nga tawo nga iginkahibalag han duha nga anay pasyente.

An munisipalidad in aada na ha General Community Quarantine ngan nakagiruginhawa na an mga residente…pero ini nga kamurayaw in gin-umpagan na liwat hin kataragman dara han pasamwak han DOH nga may bag-o nga Positive Case dida han lugar. Usa ini nga lalaki nag-eedad hin 43 anyos.

Sumala han DOH, waray hiya travel history ngadto hin mga lugar nga may mga nagkatatapnan han kagaw ngan waray liwat niya exposure hin tawo nga positibo han kagaw. Kun amo ini an impormasyon, diin ngan hin-o man an nakatapon ha iya?

An DOH in nagsumat nga ini nga lalaki in nagbabantay hin usa nga Suspected Case han COVID ha Divine Word Hospital. Ini nga Suspected Case in may Respiratory Illness, pero negatibo an resulta han iya swab sample.

Komo usa han mga protocols, ginkuhaan hin Rapid Test ini nga lalaki ngan nag positibo an resulta, sanglit ginpailarum hin laboratory test an iya swab sample ngan kumpirmado nga natapnan hiya han virus.

An hospital an ginpasabot na han DOH mahitungod hini ug nagdudumara na hin contact tracing. An LGU-Burauen in naghihimo na gihapon yana hin contact tracing han mga tawo nga iginka-urusa hini nga lalaki upod na an iya pamilya.

Dako ini yana nga paki-ana….hin-o ngan diin nakapurot han kagaw ini nga lalaki nga gintudlok nga EV Patient # 41? An naha-una nga duha nga kaso ha Burauen in Case Closed na sumala han DOH, samtang negatibo man han virus an iya ginmamangnu-an nga pasyente ha hospital.

Posible ba nga mayda niya iginkahibalag nga tawo nga nagliliniyong-liyong ha gawas nga nagdadara han ginkakahadlukan nga kagaw?

Kun ano man it kasayuran hini, klaro nga nagpapabilin an kadelikaduhan hini nga kagaw kay sugad -sugad nga deri kita maaram kun hira hin-o an natapnan ngan kun nakalusot hira ha mga monitoring units. #