Isumat.com/Setyembre 29, 2021

Mayda na igkakabanggaay hi Ormoc City Mayor Richard “Goma” Gomez para han lingkuranan pagka kongresista han ika-upat nga distrito han Leyte dida han tiarabot nga eleksyon sunod nga tuig.

Kakulop nga adlaw (Setyembre 28), hi anay COMELEC Commissioner Atty. Gregorio “Goyo” Larrazabal in nagpasamwak nga madalagan hiya para han nasabi nga posisyon ha 2022 Elections. Ini nga anunsyo ni Goyo an iya ginhimo dungan han pagsa-urog han iya ika-50 nga kaadlawan.

Hi Goyo in tikang han prominente ngan bahandi-anon nga pamilya Larrazabal ha Ormoc. An iya amay nga hi Terry Larrazabal in nagin alkalde hadto han nasabi nga syudad.

Hiya in nakagtapos han abogasiya ha University of San Carlos ha Cebu City. Antis hiya nagin COMELEC Commissioner han 2009 tobtob 2011, nagserbe gihapon hiya nga Provincial Election Supervisor ha Bulacan, Camarines ngan Basilan.

Kun manunumduman, an ngaran ni Goyo in lumutaw komo usa han ginkokonsiderar nga kaapi han Senatorial Slate han tandem nira Senador Ping Lacson ngan Senate President Tito Sotto. Nagsering hi Goyo nga iya gintirutimbang ini nga sitwasyon, pero ha katapus-tapusan, nagdesider hiya nga makandidato ha lokal nga pwesto komo kongresista.

Hi Mayor Goma in bantuganan nga harani an kasingkasing ha paugnat ha kusog o sports tungod kay naggin kaapi hiya han National Team komo fencer ngan nagmulay gihapon ha basketball ngan rowing ug iya gindara an Ormoc City komo hadi han EVRAA.

Ha panig ni Goyo, an iya pamilya in nadadabi gihapon ha sports tungod han ira Terry Larrazabal Bike Competition, mga off-road nga paprumba ngan iba pa. Nagsering hi Goyo nga usa hiya nga bike enthusiast kay pira na ka dekada nga nagbibisikleta hiya, Ngani han didto pa hiya ha COMELEC Central Office, kasagaran han panahon, nagbibiskleta hiya pagkadto ha opisina.

Hi Gomez in aada yana ha ikaduha nga termino komo amay han Ormoc, pero nagdesisyon hiya pagdalagan ka kongresista kay an iya misis nga CongWoman Lucy Torres-Gomez in madalagan ka-mayor han Ormoc tungod kay matatapos na an iya ikatulo ngan pinal nga termino komo magbabalaud.

Ha ilarum han pagdumara ni Gomez, mas nagin ma-inuswagon an ekonomiya, negosyo, pakabuhi ngan turismo ha Ormoc ug iya gintutukan an kampanya kontra han iligal nga droga.

Ginpapamulat yana kun hira hin-o nga mga pamilya ngan grupo ha Ormoc ngan 4th District han Leyte an maghahatag hin suporta ha kandidatura ni Larrazabal.

An 4th District han Leyte in ginkokomponer han Ormoc City ug an mga munisipalidad han Kananga, Albuera, Merida, Isabel, Palompon ngan Matag-ob. #