Isumat.com/Hulyo 8, 2021

Waray kalooy, ngan deri kanan tawo nga binuhatan an ginhimo nga pag-atake han kumunista nga NPA kontra han mga tropa han gobyerno ha Jipapad, Eastern Samar hadin nakalabay nga adlaw, sumala kan Maj General Pio Dinoso III, Commanding General han 8th Infantry Division han Philippine Army.

Ha interview han iFM-RMN Tacloban, nagpahayag hi Dinoso nga brutal hin duro ngan sobra pa hin masaker an natabo kun diin usa nga sundalo ngan tulo nga kaapi han CAFGU an naawat an kinabuhi dida han insidente.

Pasado alas 6 han aga, Hulyo 7, samtang tikadto han ira gin-aayad nga bag-o nga kampo an mga tropa han gobyerno, gingamaan hira han terorista nga grupo kun diin nagpabuto hin tulo nga landmines an mga rebelde ngan ginpa-arakan hin bala an mga biktima.

Nagsering an heneral nga subay dida han report, ginda-op pa han mga rebelde an mga samaran nga biktima ngan utro ginpanmumusil basi maseguro nga deri na makakatalwas.

Hinsabutan nga hadto nga takna, waray dara nga mga de kalibre nga armas an mga biktima tungod kay magpapanday la hira ha ira bag-o nga detachment.

Igindig-on han opisyal nga an ginhimo han NPA in kanan traydor nga estratehiya. Igindederi gihapon han balaud tikang pa hadton 1990 an paggamit hin landmines, pero waray sumunod hini an mga rebelde.

Kadungan hini, nagsering hi Dinoso nga posible nagkulang an paghikay hin impormasyon han mga taga barangay ug an mga kasundaluhan sanglit nakalusot an maraot nga plano an mga kumunista.

Sering pa han heneral, kinahanglan pakurukusgon pa an intelligence gathering han mga sibilyan ngan mga otoridad ngan deri tumagya basi deri na mautro ini nga indidente.

Hapagkayana, nagdudumara pa hin imbestigasyon an mga otoridad basi masayod kun ano gud an nagin hinungdan han panhitabo. #