(Image by tabloid.ph)

Isumat.com/11:00AM, July 11, 2020

Nagpasarig hi MajGeneral Pio Dinoso III, nangungulo han kanan Philippine Army 8th Infantry Division, nga waray sadang ikabaraka an publiko ha nakatalaan nga implemetasyon han Anti-Terorism Law nga bag-o pala nga pinirmahan ni Presidente Rodrigo Duterte.

Ha usa nga interview ha iFM-RMN Radio Tacloban, ginseguro ni Dinoso nga an militar in hul-os nga magsusunod han mga kaladnganan han balaud. An mga kasundaluhan in waray ginbubuhat nga pag-abuso kontra han katungod pantawo tikang pa hadto nga panahon, ngan iginpapatapod nira nga waray ma-abusar ha ilarum han bag-o nga balaud, sumala pa han heneral.

An karuyag magpahungaw han ira mga sentemento ngan araba ha gobyerno pinaagi hin mahimyang ngan deri bayolente nga protesta ngan demonstrasyon in deri angay mabaraka kay igintutugot ini han balaud. Libre gihapon an katawhan han ira mga reklamo basta deri ha masamok nga proseso ngan tatarhogon an gobyerno, dugang pa ni Dinoso.

Iginkakalipay han pwersa armada han Pilipinas an nasabi nga balaud kay dako an mahibubulig hini ha pagmentenar han kamurayawan ngan pagpoypoy han terorismo ha aton nasud, sering pa han heneral.

Hadto han waray pa hini nga balaud, limitado an mga gi-os han military kontra han mga terorista, ngan sumala kan Dinoso, pinaagi hini nga Anti-Terror Law, nagkamay-ada hin ngipon an mga tinubyanan han balaud paghalpat han mga terorista sugad man an derekta o napartisipar ngan nasuporta han terorismo.

An AFP in nagpapamulat han Implementing Rules and Regulations han balaud basi ma-istudyuhan nira ini hin hul-os para magin hapsay an implementasyon hini. #