Isumat.com/10:08AM, May 16, 2020
Nakaginhawa hin maupay hi Ormoc City Mayor Richard Gomez nga ginbawi han National IATF an naha-una nga desisyon nga bulkason na an General Community Quarantine ha Eastern Visayas. Yana unta nga adlaw, Mayo 16, mawawara na an kwarentina han publiko, pero dara han hangyo han mga LGUs, nag implementar an gobyerno hin Modified GCQ tobtob Mayo 31.
Ha usa nga panmaki-ana han local media, hi Gomez in nagbuyagyag nga nababaraka na hiya han desisyon nga tanggalon an GCQ kay posible nga mawara na an mga border control points. Kun natabo adto, nagsering hi Gomez magtitikahitaas an peligro nga magsarang an kagaw.
Partikular nga gintudlok han alkalde an Metro Manila ug an Cebu nga damo an natapnan han corona virus ngan kun waray na border control, bisan hin-o nga tawo an makakasulod ha ira syudad.
Igindugang pa han City Mayor nga makakawang la an pag-istrikto samtang mayda pa GCQ kun tigda ini nga tatanggalon ngan magkakasulod an mga tawo nga nagdadara han kagaw.
Nagsumat gihapon hiya nga kun magdudugay pa an GCQ ngan magkaada na liwat hin extension lapos han Mayo 31, waray hini problema ha iya ngan andam na liwat an lokal nga gobyerno manhatag utro hin tag-usa ka sako hin bugas ha kada pamilya han syudad.
Yana nga aada na ha MDCQ, nagtikang na in pira nga restaurant ha Ormoc para hin dine-in style han mga kliyente pero iginpapasunod an mga health protocols.
Ha ilarum han MDCQ, gintugutan na gihapon ha Ormoc an pag-abri han mga non-essential establishments.
Iginpasabot gihapon ni Gomez nga yana nga bulan, waray pa byahe an mga pampasahero nga barko tikang ha Cebu ngadto ha Ormoc.
Tobtob yana nga mga panahon, nagpapabilin nga COVID-free an syudad ug an mga naha-una nga suspected cases in nag negatibo han virus.
Padayon an liquor ban ngan pagderi hin katitirok hin damo nga tawo didto han mao nga syudad. # (KEVIN SIOSANA)
