BABATNGON, LEYTE- Guinkasuhan na an usa nga dati nga membro han Philippine Army ha pagtalapas han Republic Act (RA) 9516 o an Illegal Possession of Explosives ngan an RA 9165 o mas kilala nga Comprehensive Dangerous Drugs Act.
Nakuha ha posisyon han suspek nga hi Lemuel Villanueva residente han Brgy. Bagahupi Babatngon, Leyte an duha nga transparent sachet may sulod nga white crystalline substance nga guin-aalegar shabu nga natimbang 10 ka gramo nga nagkakantidad hin maabot 30 mil de pesos; 10 nga lighter; 7 nga gudti nga tinfoil; 2 nga improvised tooter; 1 clipper; 1 nga improvised plastic scoop; ngan MK2 fragmentation hand granade nga mayda sulod nga canister.
Nadakop an suspek pinaagi han arrest warrant nga kundiin una ini hiya nga guinreklamo han iya la patod (first cousin) nga nagsalawad hin kaso nga rape ngan serious illegal detention.
Subay han tagreklamo nga guinbubutangan daw an iya ikinatawo hin upak hin saging ngan guinpapagamit daw guihapon ha mga barkada han suspek.
Nanguna han operasyon hi PSInsp. Elvis Angayangay ngan ini in kaparte han kamapanya han mga kapulisan nga pagrekopo han mga layaw nga pusil ha ilarum han Oplan Paglalansag ngan Oplan Big Berta kampanya alakontra han ilegal nga droga.
PAMPASAHERO NGA VAN BUMALIGTAD: 13 KATAWO SAMARAN
STA. RITA, SAMAR- Padayon pa nga nagpapatambal an mga sakay han bumaliktad nga Grandtours van ha may Brgy. Magsaysay Sta Rita Samar.
Sumala ha nakuha nga report in mahulos nga kalsada an gin tutudlok nga rason han pagbaliktad han mao nga pampasahero nga van han GrandTours nga may sakay nga 13 nga mga pasaheros.
Ha report in ginsisiring nga tikang daw ha Catbalogan City an mao nga sarakyan tipakadto ha syudad han Tacloban.
Waray naman may nagsalawad hin reklamo alakontra han driver han van ngan guinbaydan han tag-iya han sarakyan an ngatanan nga gastos ha ospital han mga pasaheros.
9 ANYOS NGA BATA USA NA KA SEMANA NGA NAWAWARA
TACLOBAN CITY – Naglalaum hi Marilou Camora nga matatad-an pa nira an nawawara hini nga anak nga usa na ka semana nga nawawara.
An bata in guinkilala kan Ryza Gen Camora, 9 anyos ngan residente han Brgy. 37 Seawall syudad han Tacloban.
Hi Ryza in dida pa han sabado nga adlaw nawawara, ngan subay han iya kag-anak nga ini in nakasul-ot hin sleeveless nga dulaw nga bado, short nga halipot, magasa, 4ft an height ngan mayda ini hiya arum ha iya im-im.
Nakikimalu-oy hi Marilou kun hin-o man an nakilala ngan nakakita kan Ryza in igpasabot la ha ira pamilya ha Brgy 37 Seawall o kun mismo nga igturn-over ha mga kapulisan.
9 YOLANDA SURVIVORS NASALBAR TIKANG HA PROSTITUSYON
CALOOCAN CITY – Upat nga mga menor de edad ngan lima pa nga mga kababayin-an an naisalbar tikang ha usa nga prostitusyon den ha Caloocan.
Guinsulong han mga tinaglawas han National Bureau of Investigation an mga kabablayan ha 2nd avenue han mao nga lugar nga kun diin naabtan nga nakatambay an mga biktima samtang naghuhulat hin parokyano.
Lima nga bugaw naman an naaresto ha mao nga raid.
Nabaruan nga puro mga taga Samar an naisalbar nga mga biktima nga kun diin survivor han Bagyong Yolanda nga umigo ha Sinirangan Bisayas dida han nakalabay nga tuig.
