Isumat.com/Disyembre 1, 2021
Ginhihingita han Eastern Visayas State University (EVSU) nga makag-implementar han “Face to face classes” ha pag-abri han 2nd semester.
Ini an iginpahayag ni Dr. Dennis De Paz, Presidente han unibersidad, ha iya pakig-atubang han media kakulop nga adlaw, Nobyembre 30, 2021. Ini nga Press Conference in kaparte han Investiture Activities han pormal nga paglingkod ni De Paz komo ika-upat nga nagmamangulo han unibersidad.
Sumala kan De Paz, deri ma-aakos han EVSU nga matuman dayon an duro kadamo nga rekisitos han Commission on Higher Education (CHED) para han face to face classes yana nga Disyembre, sanglit target han eskwelahan nga ig-implementar ini hiton Enero 2022 dungan han pagtikang han ikaduha nga semestre.
Iya gihapon ginklaro nga deri ngatanan han estudyante in makakatagamtam hini nga face to face classes kay prayoridad han EVSU an 3rd ngan 4th year levels kay hira an mayda mga laboratory classes.
Gin-esplikar pa han opisyal nga limitado ini nga face to face classes kay deri magdudurungan pagsulod ha eskwelahan an kada section, kay hira in pagbubublagon ngadto hin tulo o upat nga grupo nga magliliwan-liwan pagsulod kada semana.
Magpapadayon gihapon an modular ngan on-line schooling, sanglit matatawag la gihapon ini nga blended learning.
Kasumpay hini, hingpit an pag-andam han EVSU han infrastractura nga gagamiton ha face to face classes. Syahan hini an pag-retrofit han mga classrooms basi maseguro an 1.5 meters nga distansya han mga estudyante.
Nag-aandam gihapon an EVSU hin Isolation rooms para han mga estudyante ngan iba pa nga magpapakita hin sintomas han Covid-19.
Aabrihan gihapon han unibversidad in usa pa nga agi-anan han mga estudyante ngan personales basi magkaada hin lain nga entrance gate ngan bulag la liwat an exit gate.
Gin-aaghat gihapon ni De Paz an mga estudyante nga magpabakuna na basi maka-api han face to face classes. Iya pa iginpahayag nga aada na ha 97 porsyento an mga personales han EVSU nga nakatagamtam na han Covid-19 Vaccine.
Igindugang pa ni De Paz nga andam an Guidance Office han EVSU para maghatag hin kasalagdunan ngan pagpakusog han mental health han mga estudyante labi na yana nga panahon han pandemya.
Kun aprobaran na han CHED ini nga plano, an face to face classes in igpapatuman ha EVSU-Main Campus ha Tacloban sugad man ha mga external campuses nga namumutang ha Ormoc City, Carigara, Dulag, Burauen ngan Tanauan. #
