Isumat.com/6:45AM, July 14, 2020

Padayon an malaum-laum nga recovery rate han pasyente han COVID-19 ha Eastern Visayas. Kakulop (Hulyo 13) iginreport han DOH Regional Office nga mayda 28 nga nakatalwas tikang han virus. Tungod hini, 607 dida han 653 nga natapnan an naka-recover na. Ini in haros 93% nga recovery rate.

Hapagkayana, 43 nala an Active Cases nga naka-admit ha mga hospital ngan Isolation Units, samtang nagpapabilin nga tulo katawo an namatay tungod han corona virus ha aton rehiyon. An mga health workers nga natapnan in 107 ngan haros ngatanan ha ira in naka-recover na.

Dida gihapon han report han DOH, pito katawo an nahidugang han mga nagpositibo han kagaw. Tulo ha ira an mga residente han Ormoc City. Waray iginhatag nga impormasyon an LGU-Ormoc kasumpay hini, labot la han pagsering nga waray mga sintomas han virus an nasabi nga mga nagpositibo ngan waray angay ikabaraka kay tikang han ira pag-abot, deretso na hira ha Isolation Area han syudad.

Samtang an bag-o naman nga nagpositibo ha St. Bernard, Southern Leyte in 26 anyos nga lalaki tikang ha Cebu. Nagpahayag an LGU nga para ha ira, naka-recover na gihapon ini nga pasyente kay maupay an panlawas ngan sobra na hin tulo ka semana an iya kwarentina. Ha luyo nga bahin, waray pa maghatag hin detalye an LGU-Silago bahin han bag-o nga natapnan han kagaw ha ira bungto.

Didto naman ha Tanauan, Leyte, 58-anyos nga babaye an bag-o nga nagpositibo. Hiya in tikang ha Manila nga umabot ngadto han bungto hadton Hunyo 26. Waray hiya iginpapakita nga sintomas han virus.

Usa naman nga 46-anyos nga lalaki an bag-o nga COVID Patient ha Isabel, Leyte. Umabot hiya ha Isabel hadton Hunyo 25 tikang ha Manila. Sumakay hiya hin eroplano nga tumugpa ha Tacloban Airport hito nga petsa. Maupay gihapon an iya panlawas ngan aadto ha Isolation Unit han munisipalidad. #