Isumat.com/2:10PM, August 6, 2020

Usa nga estudyante ha kolehiyo an nakuhaan hin marijuana han mga tinubyanan han balaud han sitaron an iya grupo ha usa nga checkpoint ha Barugo, Leyte hadin Agosto 4, 2020.

Ginkilala han mga otoridad an nagdadara han igindederi nga marijuana nga hi Jessnikko Lagarde, 25 anyos, residente han Brgy Cayare han San Miguel, Leyte. Hiya in graduating student ha Visayas State University-Alangalang Campus. An duha nga iya kaupod in mga taga San Vicente, Alangalang ngan Brgy Nauguisan, Carigara, Leyte.

Sumala han report han Barugo PNP, an tulo in sakay hin motorsiklo tikang magpahalayahay hin usa nga beach ha Capoocan. Pag-abot han grupo ha checkpoint, ginsita hira han kapulisan tungod nga waray hira face mask.

Samtang ginpapaki-anhan hira han kapulisan, na-obserbaran nga nagpaka-inom hira hin makahurubog nga irimnon. Nasipatan gihapon han kapulisan nga may gin-iipit nga busag nga papel hi Lagarde dida han iya hawak. Ginpa-abrihan han kapulisan an pakete nga busag ngan natad-an nga may marijuana nga sulod.

Gin-inspekyon pa an sling bag han suspetsado ngan nadiskubre nga mayda pa duha nga pakete hin marijuana.

Dara hini, gindara an mga suspetsado ha Police Station ngan sasampaan han kaangayan nga mga kaso.

Ha iba naman nga panhitabo, na-aresto han mga operatibe han PDEA-Region 8 an High Value Target nga hi Reggie Arandia ha usa nga buy-bust operation ha Brgy 62, Sagkahan, Tacloban City.

15 ka gramo hin gintatahapan nga shabu nagkakantidad hin sobra Mil Pesos an nakumpiskar tikang ha iya. Ini nga suspetsado in preso yana ha PDEA Detention Facility. #