Isumat.com/8:43AM, August 17, 2020
Nagkaka-impati yana an report han militar ug an istorya hin pira nga mga baryuhanon kasumpay han insidente nga natabo ha Sitio Kabugawan, Brgy Aroganga ha Dolores, E. Samar.
Dida han pahayag han 78th Infantry Battalion han Philippine Army , naghihimo hin patrolya an ira mga tropa didto han nasabi nga lugar pasado ala-1 han maagahon kakulop (Agosto 16) han igkasurapo hira hin porlomenos 20 nga mga rebelde nga kumunista.
Nagkaada hin balyu-ay hin bala nga humagos hin singko minutos nga nagresulta han kamatay hin usa nga gin-aalegar nga rebelde ginkilala nga hi Dino Davila nga residente han Brgy Cagtabon. Iginreport gihapon nga nasamad in duha nga sundalo dida han pinusilay.
Nakuha han militar dida han lugar in usa nga granada, 11 nga basiyo hin M-16, ngan tulo nga basiyo hin kalibre .45.
Kataliwan hin pira ka oras katapos han gin-aalegar nga engkwentro nagpagawas hin mga komentaryo an pira nga mangurukoy didto han mao nga barangay. Sumala ha ira, deri miembro han NPA hi Davila. Ini daw nga namatay in haros ka adlaw nagbabaktas dida hito nga lugar ngan mayda niya problema ha panhuna-huna.
Mayda gihapon mga residente an nagsumat nga duha la nga buto hin pusil an ira nabati-an hadto nga maagahon.
Nagsering naman an militar nga padayon yana an ira ginhihimo nga paglanat han nan-ngalagiw nga mga rebelde. #
