Isumat.com/Oktubre 20, 2021
Nagpapadayon an pagkadadakop hin mga magtatrabaho ha gobyerno nga nahidadabi hin pamaligya hin iligal nga droga.
Kakulop, Oktubre 19, 2021, nagdumara hin anti-illegal drugs operation an mga operatiba han PDEA-Region 8 ngan mga kapulisan kun diin nasikmit an suspetsado ginkilala nga hi John Paul Baduya, empleyado han LGU-Tacloban City nga naka-assign ha Tacloban City Hospital.
Dida han operasyon nga ginhimo pasado alas 6 han gab-i ha Brgy 62-A, Sagkahan, nakakuha an mga otoridad hin gintatahapan nga shabu may kabug-aton nga .05 ka gramo tikang kan Baduya. Ini in labot la hin papel nga gingusi-gusi nga gintotoohan iginputos hin iligal nga droga.
An 23-anyos nga suspetsado in nakapaslak na ha karsel ngan nakatalaan umatubang han kaso nga igsasalawad kontra ha iya.
Kun manunumduman, tulo pala semana an nag-agi, nagka-aaresto in duha nga mga empleyado han Tacloban City National Agricultural School ha magkalain nga operasyon.
Han una nga semana, usa nga empleyado han Eastern Visayas State University an nasikmit gihapon ha buy-bust operation.
Hadton Agosto, duha nga gwardya ha Sub-Provincial Jail ha Hilongos ngan Carigara, Leyte an nahilaprak ha mga kamot han balaud tungod gihapon han gin-aalegar nga pagbaligya han igindederi nga droga. #
