(Image by New indianexpress_

Isumat.com/ Disyembre 1, 2021

An malipayon nga pagbalik ha pamilya katapos umapi hin kompetisyon ha paprumba in nagin eksena hin kabido-an han maawat an kinabuhi hin duha nga siklesta nga taga-Leyte dida hin makangingirhat nga aksidente ha kadalanan ha San Isidro, Northern Samar, kakulop, Nobyembre 30, 2021.

Ginkilala han mga otoridad an namatay nga hira Lando Lance Dolina, 51 anyos, han Sagkahan, Tacloban City; ngan Jake Gatela, 20 anyos, residente han Alangalang, Leyte.

Dida han inisyal nga imbestigasyon, hira Dolina ngan Gatela ngan upat pa nga iba in sakay hin Ford Ranger Pick-up nga ginmamaneho-an ni Dave Tabuyan nga residente han Tacloban. An grupo in tibalik na unta ha Leyte tikang umapi hin kompetisyon hin paprumba ha Northern Samar.

Pasado alas onse han aga, samtang ginsusulsog han pick-up an national highway ha Brgy Palanit, San Isidro, Northern Samar han matabo an aksidente kun diin iginkabunggu-ay hira hin trak nga ginmamanehoan ni John Sidayao, 32 anyos, nag-uukoy ha San Joaquin, Iloilo.

Subay han impormasyon, an trak in nag-ensima hin usa pa nga sarakyan ngan pagkabat hini han kaluyo nga lane han kalsada, tyempyo liwat nga naagi an sarakyan han mga biktima. Waray na makalikay an trak ngan nasampakan hini an pick-up.

Tungod han duro kamakusog nga impact han bangga-ay nag-antos hin grabe nga karamtan ha lawas hira Dolina ngan Gatela. Kadagmitan hira gindara ha hospital pero igindeklarar nga dead on arrival. An ira mga kaupdanan nga nag-antos gihapon hin karamtan ha lawas in gintatambal yana.

An drayber han trak ngahi Sidayao in gindara naman ha San Isidro Police Office para han kaangayan nga disposisyon.

Kasumpay hini, an magkalainlain nga grupo hin mga Riders ngan Bikers ha bug-os nga rehiyon in nagpabati han ira tim-os nga pagsimpatiya ngan pakigduyog han kabido-an ha tagsatagsa nga pamilya han mga biktima. #