TACLOBAN CITY – Samaran an duwa ka bata matapos paninigbason ha Brgy. Sto. Niño, Laoang, Northern Samar, dida han nakalabay nga Setyembre 14, huwebes na adlaw.

An mga biktima inin nag angkon hin mga samad ha ira kalawasan ngan gin kilala nga hira Mica Rosendal, otso anyos ngan hi Syra Espina, syete anyos an pangidaron.

Samtang ang suspetsado inin gin kilala naman nga hi Marlo Acebuche, 39-anyos an pangidaron nga taga barangay Arongangan han pareho nga bungto.

Sumala han inisyal nga imbestigasyon han kapulisan, nakadto ini nga mga kabataan han panimalay niFlorma Macatane ngan nagkikit la hin pasalida ha telebisyon han sumakob ini nga suspetsado nga gin aalegar hubog ngan may dara nga pisaw ngan tigda la nanigbas.

An duwa nga biktima inin dayon naman nga gin dara ha GB Tan Memorial Hospital ngan gadayon nga tinambal.

Samtang an gin aresto nga suspetsado inin gindara ha Laoang Municipal Police Station para han documentation ngan disposition agud mapasakahan hin kaangayan nga kaso.