Isumat.com/7:41AM, November 24, 2020
Nakwelyuhan in usa nga anay konsehal hin bungto ha Eastern Samar samtang namatay naman an drug suspect ha Maasin City dida hin mga illegal drugs buy-bust operation han mga tinubyanan han balaud.
Didto ha Hernani, Eastern Samar, katapos hin pira ka bulan nga pagmanman nahilaprak ha kamot han balaud an suspetsado nga hi Marcos Abaloyan, anay konsehal han nasabi nga bungto. An 60-anyos nga suspetsado in usa han mga High-Value Targets dida han probinsya.
Dida han operasyon, nakumpiskar kan Abaloyan in lima ka sachet hin gintotoohan nga shabu kantidad hin sobra Mil Pesos. An mga operatiba han PDEA-Region 8 ngan PNP Provincial Drug Enforcement Unit an nagdumara han nasabi nga operasyon.
Ha luyo nga bahin, namatay an suspetsado nga hi Gerry Calunod han umato ini ha mga otoridad nga mag-aaresto na unta ha iya didto ha Brgy Pugaling, Maasin City.
Hi Calunod in naka-abat nga pulis an iya ka-transaksyon han droga sanglit iya ginbulnot an iya pusil pero naunahan hiya pagpabuto han mga tinubyanan han balaud ngan naigo hiya ha magkalainlain nga parte han lawas.
An mga elemento han PDEA-Region 8 ngan Maasin City PNP an naghimo han nasabi nga operasyon.#
