Isumat.com/8:17AM, June 6, 2020
Waray gad nag-uungara nga matapnan han COVID-19, pero kun umabot man an takna nga pagkikinahanglanon in Quarantine Area para han ira mga empleyado, nag-andam na para hini an DPWH Regional Office.
Sumala han report han ahensya, kumpleto na an ira Quarantine Facility nga namumutang ha ira building harani han San Juanico Bridge-Leyte Side. Ginhimo nga facilidad para hin kwarentina an Mini Training Room ug an Employees Quarters.
Gintikangan an pagtrabaho hini hadin Abril ngan han nag-agi nga semana, natapos na an paghimo han mga cubicles, pahayag ni Engr.Angelita Obediencia. Ini nga facilidad in fully air-conditioned ngan magseserbe han ira mga empleyado nga posible matapnan han virus. Pero ira ginklaro nga para la ini han mga kaso nga deri grabe o deri kritikal an kahimtang.
An Training Room in may kapasidad para hin pito nga pasyente, samtang an Employees Quarters in makaka-akomodar hin siyam nga pasyente. Mayda gihapon hini nurses stations, handwashing areas, toilets ngan disinfection equipment.
Sumala pa han report, ingkaso magtikadamo pa an suspected cases, nag-andam gihapon an ahensya hin napulo nga mga tents.
Nakatalaan nga magdumara hin inspection an Department of Health basi ma-aprobaran an operasyon han facilidad ug mismo mga personales han DOH an magdudumara han facilidad.
An ahensya in naningkamot nga matukod ini nga proyekto ha panguna ni Regional Director Nerie Bueno komo pagsunod han pag-aghat ha ngatanan nga DPWH Regional Office nga maghimo hin pitad basi kabuligan an ira mga magtatrabaho nga posible madarahigan han virus. # (KEVIN SIOSANA)
