Isumat.com/Abril 29, 2021

Waray tawo nga anhi yana ha Eastern Visayas nga nagdadara han mas matapon nga UK Variant han Covid-19.

Ini an ginklaro han DOH Regional Office kasumpay han nagsarang nga mga iru-istorya ngan mga post ha social media nga nakasulod na daw ini nga variant ha Rehiyon Otso.

Hi Dr. Marc Steven Capungcol, nangungulo han Regional Epedemiology and Surveillance Unit han DOH, in nag-esplikar nga an tawo nga natapnan han UK Variant in waray makakuha han virus denhi ha aton rehiyon, kundi posible nga didto ha Manila.

Sumala kan Capungcol, ini nga tawo in tikang ha Region 8 ngan bumiyahe tikadto ha Manila hadton Marso basi mag-areglar han iya mga papeles kay na-ikasarakay utro hin barko tungod kay seafarer an iya trabaho. Didto hiya ha Manila gin-swab test ngan nag positibo hiya han UK Covid Variant.

Tungod hini, ginbutang hiya ha Isolation Facility ha Manila ngan nag-istar didto tikang han Marso 18 tobtob Abril 9. Nakabalik hiya nganhi ha rehiyon katapos han 20 ka adlaw nga isolation period ha Manila.

Tungod kay taga Eastern Visayas man hiya, gumawas ha record han DOH Central Office nga mayda taga Region 8 nga natapnan. Ginpanginano ini dayon han Regional Office ngan nakakuha hira han kasayuran han sitwasyon.

Basi makasegurado an DOH Regional Office, utro gin-swab test ini nga tawo ngan negatibo an resulta. Ginkuhaan gihapon hin swab sample an iya mga close contacts ngan negatibo gihapon ha covid.

Bootsidngon, waray pa denhi ha aton rehiyon an bisan ano nga klase hin variants, sering pa ni Capungcol.

Pero igindig-on han health official nga deri kita tumagya kay ha bisan ano nga oras, puede makasulod ha aton lugar an mga variants nga gintutudlok nga mas matapon ngan mas grabe an epekto ha pasyente.

Nagpahayag gihapon an DOH nga nagpapadayon an hingpit nga surveillance tungod han nagtitikadamo na liwat nga mga kaso han Covid ha Sinirangan Bisayas. #