Isumat.com/5:13PM, June 17, 2020

Ginklaro han DOH Regional Office nga nagpapadayon an operasyon han Eastern Visayas Regional Medical Center (Cabalawan ngan Magsaysay) ha Tacloban City.

Hi DOH Regional Director Minerva Molon in naghatag hin kasayuran tungod han iginpagawas nga Temporary Closure han Emergency Department han nasabi nga hospital. An Emergency Room la ha Cabalawan ngan Magsaysay an ginpasadhan sumala kan Molon.

Ini nga temporaryo nga pagsara han ER in mahagos hin tulo tobtob lima ka adlaw para han disinfection, pahayag pa han DOH. Ini an nagin kabatunan han ahensya mahitungod han mga pagsuson hin pira nga sektor kun kay-ano nga igpapasara an bug-os nga hospital bisan kun pira la nga personales an natapnan han COVID-19.

Dida han report han DOH kagab-i, 16 nga personales han EVRMC an kumpirmado nga nag positibo han kagaw, hinungdan nga ginsuspender an operasyon han ER. An iba nga departamento han hospital an nagpapadayon an operasyon ngan pagtimangno han mga pasyente.

Gin-angkon naman ni Dr. Salvador Evardone, Chief of Hospital, nga nagkaada hin kasaypanan an pira nga personales han hospital ha pagtagad han mga pasyente salit nakalusot an kagaw ngadto han hospital.

Unom nga doktor, pito nga nurses, duha nga nursing attendants, duha nga technicians ngan usa nga ambulance driver han EVRMC an na-alakbatan han virus. Gindudumara yana an contact tracing basi matudlok ngan mabantayan an mga tawo nga iginka-urusa hini nga mga health personnel..

An EVRMC amo an nag-uusaan la nga Government Tertiary Hospital ha Eastern Visayas ug an kadam-an nga may balati-an ha panlawas, labi na an mga kablasanon in nasandig ha serbisyo han hospital.# (KEVIN SIOSANA)