Isumat.com/1:53PM,June 20,2020

Mayda na liwat nahidugang dida han nagtitikahilaba nga listahan han mga nagpositibo han corona virus ha Eastern Visayas.

Deri pala maiha, an DOH Regional Office in nagpagawas han laboratory results nga ginproseso ha Divine Word Hospital Testing Center kun diin 6 dida han 131 nga swab samples an positibo an resulta.

Ha syahan nga higayon, mayda na Positive Case an Palompon, Leyte ngan tulo hira ka tawo. Amo ini an 27 anyos nga lalaki nga umuli ha Palompon tikang ha Misamis; 30 anyos nga lalaki tikang ha Cebu; ngan 34 anyos nga lalaki tikang gihapon ha Cebu.

An bungto han Palo in nadugangan hin duha nga kaso. Babaye ngan lalaki, ngaduha ha OFW. Samtang an San Miguel, Leyte in may kadugangan nga pasyente pinaagi hin 58 anyos nga lalaki nga bumalik ha ira bungto tikang ha Manila.

Ha luyo nga bahin, iginpahayag naman han Leyte Normal University nga mayda nira empleyado nga natapnan han virus. Ini in lakip dida han mga resulta nga ginpagawas kakulop han DOH.

Ginseguro naman han liderato han unibersidad nga ira ginbubuhat an ngatanan basi matudlok an posible nga iginka-urusa han pasyente ha ira eskwelahan basi kabalabgan an paglarab han kagaw.

Dida han update kakulop han DOH, 39 nga pasyente an naka-recover tikang han virus ngan kasagaran in mga mild cases. Porlomenos 30 nga medical personnel han rehiyon an natapnan han kagaw.

An DOH in padayon nga nagpapahinumdom ha ngatanan nga bisan ano pa man an kabutangan han lugar,ma ECQ, GCQ, o MGCQ man ini, deri gud mag ginawas gawas han balay kun deri kinahanglan ngan kun gumawas man pirmi magsul-ot han face mask, ngan obserbaran an physical distancing.KEVIN SIOSANA)