Kay ano nga deri pareho iton ka dakmol han mga kalsada nga guin pailarom han “road widening nga proyekto han Department of Public Works and Highways (DPWH) nga nakaka sakop han Tacloban City Engineering District nga naguin hinungdan hin pira nga disgrasya ha kadalanan.

Ini an pakiana han publiko nga guin baton liwat ni District Engineer Arnaldo Bonifacio ha interview han isumat.com.

Sumala kan Bonifacio nga dida han ipatuman an pan aspalto han mga naguguba na nga mga ka kalsadahan han Maharlika higway han mga tuig 2014 ngan 2015 an mando haira han central office han DPWH nga kon magkakada man hin “road widening” an pa hahaluagon nga kalsada in deri kinahanglan nga matupong an ka dakmol han aspalto kundi dida han orihinal nga kahatas-on han kalsada hinungdan han deri pareho nga kahaitas-on han kalsada.

Pero ha pag labay hin usa katuig nagkaada hin bag-o nga ka manduhan an DPWH nga kinahanglan iturupong nala liwat an kahitas-on han mga kalsada nga guin pailarom han “asphalt overlay” nga han “road widening” nga amo na iton ira guin tratrabaho yana.

Han siyahan gumamit hira hin (cold mix) nga aspalto pero ira na obserbahan nga madagmit la ini malaknit pag hagos la hin mga walo ka bulan hinungdan nga hira in nag hangyo nga an “hot mix” na nga klasi hin aspalto an gamiton nga amo iton ira ginagamit yana.

Pero guin klaro ni Engineer Bonifacio nga deri siyento porsiyento nga mag tuturupong gud dayon iton mga ka kalsadahan kundi ipapailarom la anay ini hin “transition” tungod nga huhulaton anay iton singko años para utro nga patungan hin aspalto an mga bag-o nga parti han kalsada subay hiton patakaran hit DPWH.