UNTV Cup Defending Champion DENR Warriors

Isumat.com/ Nobyembre 23, 2022

Ha atubangan han pangayat han iba nga basketball teams, manlilimbasog an DENR Warriors nga deri maagaw an titulo ha ira komo defending champion han UNTV Cup.

Ini nga prestihiyoso nga Liga ng Public Servants in pormal nga gin-abrihan an Season 9 hadin Nobyembre 21, 2022 ha Smart Araneta Colisuem.

An DENR Warriors amo in pag-gigiyahan han ira mga coaches nga tikang ha Region 8 pinaagi kanda Head Coach Atty. Ernesto Adobo Jr, Undersecretary for Legal, Admin, Human Resource and Legislative Affairs; ngan Atty Norlito Eneran, Director for Legal Affairs Service.

Hadton UNTV Cup Season 8, an Warriors an nagin kampeon han torneo kun diin ira ginperde ha finals an 3-time defending champions AFP Cavaliers. Kataliwan hadto, naundang hin temporaryo an kompetisyon tungod han pandemya.

Han magkampeon an DENR, hira in nakahimo hin record ha UNTV, kay hira pala an syahan nga Rookie Team nga naghadi han torneo.

Ini nga torneo in tinatawag nga charity tournament kun diin an premyo in igdodonar han kampeon ngadto han ira napili nga benefeciario. Hadton Season 8, an 4 Milyones pesos nga premyo in iginhatag han Warriors ha Environmental Heroes Foundation Incorporated.

Para han yana nga tuig, napili han DENR nga magin benefeciario han premyo an Environmental Sports Association Inc. Ini nga grupo in non-stock ngan non-profit organization nga pinamumunuan ni Engr Al Ellema.

Hi Ellema in nagsumat nga an ira grupo in may panuyo pagpadukwag han panlawas han mga environmental workers ngan mga adbokasiya hini.

Para han Season 9, 12 nga teams an umapi han torneo ug amo ini an AFP Cavaliers, Judiciary Maggis, GSIS Furies, OP-PMS Trailblazers, Philhealth Konsulta ngan DA Foodmasters nga nagkokomponer han Bracket A; samtang an Bracket B in ginkokomponer han NHA Homemakers, PNP Responders, Umbodsman Graft Busters, SSS Kabalikat, Senate Defenders ngan DENR Warriors.

An mga miembro han kada team in kinahanglan empleyado han ahensya hin porlomenos duha ka tuig antis an torneo ngan waray magmulay hin professional league han nag-agi nga singko anyos.

An Opening ceremony in pinangunahan ni UNTV CUP Founder Daniel Razon ngan UNTV Cup Commissioner Atoy Co nga kaapi hadto han sikat nga Crispa Redmanizers ha PBA.#