Mahugot an pahimatngon han Department of Health-Region 8 nga deri hingalimtan han katawhan an mga pitad basi makalikay han sakit nga dengue nga nakaka-awat gihapon hin kinabuhi.
Sumala kan DOH-8 spokesperson John Paul Roca, kinahanglan padayon an paghirot kontra han dengue kadungan gihapon han mga pitad kontra han paglarab han COVID-19. Nagpahayag hi Roca nga unom na katawo an binawi-an hin kinabuhi denhi ha Eastern Visayas dara han dengue tikang han Enero tobtob Marso 23, 2020.
Ini nga mga nagkamamatay in natabo ha Tacloban City, Ormoc City, Baybay City, Abuyog, Leyte, La Paz, Leyte ngan Eastern Samar. Kasumpay hini, padayon an pag-aghat han DOH ha publiko nga limpyuhan an sulod ngan libong han balay basi mawara an puede pagbonayan han lamok.
Dida han record han DOH, sobra na tres mil an nahipatik nga dengue cases ha aton rehiyon tikang han Enero tobtob Marso salit kinahanglan mag-ikmat ngan maghirot an ngatanan kontra hini nga sakit. #
(Posted 9:10 AM, April 1, 2020)
