Isumat.com/6:30PM, June 13, 2020

Doble an paningkamot yana han mga otoridad han panlawas basi matudlok kun diin o hin-o an nakatapon han corona virus han tulo nga bag-o nga Positive Cases han Eastern Visayas.

Subay han report han DOH Regional Office, ini hira amo an mga pasyente tikang ha Hilongos ngan La Paz, Leyte ug an taga Tacloban.

An residente han Hilongos in 22 anyos nga lalaki nga may sakit ha kasingkasing. Gin-admit hiya ha EVRMC-Magsaysay hadin Huebes ngan kakulop gumawas an resulta nga positibo hiya han COVID-19. An impormasyon tikang ha Hilongos in nagmamalatumat nga waray travel history ini nga pasyente ngan talagsa la gumawas han balay dara han iya sakit. An mga kaapi han iya pamilya in waray gihapon travel history ngan waray iginkahibalag nga mga tawo nga positibo han kagaw.

An taga La Paz in 38 anyos nga lalaki nga naka-admit ha EVRMC-Magsaysay tungod hin Severe Acute Respiratory Illness ngan nagpositibo an resulta han iya swab sample. Nagpahayag an LGU-La Paz nga napapa-usa gihapon hira kun kay-ano nga matatapnan ini nga ira mulopyo kay waray man gihapon travel history ngadto hin mga lugar nga may kaso han corona virus.

Ha luyo nga bahin, an bag-o nga kaso ha Tacloban in usa nga 32 anyos nga babaye. Hiya in health worker nga naka-assign ha Triage Area ha EVRMC-Magsaysay.

Kun waray travel history an taga Hilongos ngan La Paz, diin man hira nakapurot han ginkakahadlukan nga kagaw? Hin-o man an nakatapon ha ira? Hin-o ngan diin nga lugar natapnan an health worker ha EVRMC? Posible ba hira nga tulo an nagpatapon-tapon kay aadto man hira ngatanan ha EVRMC-Magsaysay? O mayda ba iba nga mga tawo nga nagsusudoy-sudoy nga may dara nga kagaw nga nakatapon ha ira? Ini in pira la han mga paki-ana nga karuyag masayuran han mga health authorities nga nagsususi hini nga mga insidente.

Ini nga tulo nga pasyente in lakip dida han bag-o nga 42 nga Positive Cases nga igin-anunsyo kakulop han DOH ha aton rehiyon. # (KEVIN SIOSANA)