Isumat.com/3:04PM, August 17, 2020
Nadugangan an mga namatay nga pasyente han Covid-19 ha Eastern Visayas kataliwan la nga tumalikod ha kadayunan an 66-anyos nga babaye nga taga San Julian, Eastern Samar.
Subay han nahikay nga impormasyon han Isumat.com, namatay an pasyente hadton Sabado, Agosto 15, ha Eastern Visayas Regional Medical Center kun diin hiya naka-confine. Igindugang pa han impormasyon nga hadto mismo nga adlaw, iginbiyahe ngadto ha San Julian ngan iginlubong didto an patay nga lawas.
An DOH-Regional Office in waray pa magkumpirmar hini nga insidente tobtob han ginsusurat ini nga notisya. Waray pa gihapon report kun Covid-19 ba an hinungdan han iya kamatay. An pasyente in nag-aantos hin sakit ha kidney hin maiha na nga panahon.
Hadton syahan nga semana han Agosto, nagpa kunsulta hiya ha Borongan Doctors Hospital, pero ginsagdunan nga pumakadto ha Tacloban para magpa-ilarum hin dialysis.
Nagpa-admit hiya ha Divine Word Hospital ug dida han Agosto 10, gumawas nga positibo an resulta han Covid swab testing ha iya. Pagka-buwas iginbalhin hiya ha EVRMC ngan didto na hiya namatay. Kakulop, Agosto 16, amo unta an iya pagsa-urog han iya ika-67 anyos nga kaadlawan.
Mayda gihapon mga notisya nga tobtob yana waray pa gumawas an resulta han swab testing han duha ka tawo nga nagbantay ha iya ha hospital.
Hapagkayana, unom na katawo ha Region 8 an namatay tungod han Covid-19. An Isumat.com in naghuhulat pa han report han DOH kasumpay hini nga namatay nga taga San Julian. #
